ಮಂಗಳೂರು, ಜುಲೈ.26: ವಿದ್ಯಾರ್ಥಿಗಳೇ ಬನ್ನಿ ಕುಡಿಯಿರಿ, ಪಾರ್ಟಿ ಮಾಡಿ ತೂರಾಡಿ.. ಹೀಗೆಂದು ಮಂಗಳೂರಿನ ರೆಸ್ಟೋರೆಂಟ್ ಒಂದರಲ್ಲಿ ಆಫರ್ ನೀಡಲಾಗಿದೆ. ನಗರದ ದೇರೆಬೈಲು ಕೊಂಚಾಡಿಯಲ್ಲಿ ಲಿಕ್ಕರ್ ಲಾಂಜ್ ಹೆಸರಿನಲ್ಲಿ ಹೊಸತಾಗಿ ಆರಂಭಗೊಂಡ ಹೊಟೇಲ್ ರೆಸ್ಟೋರೆಂಟ್ ಈ ರೀತಿಯ ಆಫರ್ ನೀಡಿ ವಿವಾದಕ್ಕೆ ಸಿಲುಕಿದೆ.

ಸ್ಟೂಡೆಂಟ್ಸ್ ನೈಟ್ ಬಿಗ್ ಆಫರ್ ಹೆಸರಲ್ಲಿ ಲಿಕ್ಕರ್ ಲಾಂಜ್ ನಲ್ಲಿ ಆಯೋಜನೆ ಆಗಿದ್ದ ಪಾರ್ಟಿಗೆ ಸದ್ಯಕ್ಕೆ ಕಾವೂರು ಪೊಲೀಸರು ತಡೆ ಹಾಕಿದ್ದು, ಬಾರ್ ಮಾಲಕನಿಗೆ ನೋಟೀಸ್ ನೀಡಿದ್ದಾರೆ. ಪಾರ್ಟಿ ಆಯೋಜಕರು ಸ್ಕೂಲ್ ಐಡಿ ತಂದರೆ ವಿದ್ಯಾರ್ಥಿಗಳಿಗೆ 15 ಪರ್ಸೆಂಟ್ ಆಫರ್ ನೀಡಲಾಗುತ್ತದೆ. ಅಲ್ಲದೆ, ವಿದ್ಯಾರ್ಥಿನಿಯರಿಗೆ ಐಡಿ ತೋರಿಸಿದರೆ ಫ್ರೀ ಶೂಟರ್ ವ್ಯವಸ್ಥೆ ಇದೆಯೆಂದು ಆಫರ್ ನೀಡಿದ್ದಾರೆ. ಲಿಕ್ಕರ್ ಲಾಂಜ್ ಆಯೋಜಿಸಿದ್ದ ನೈಟ್ ಪಾರ್ಟಿಯ ಸ್ಟಿಕ್ಕರ್ ಜಾಲತಾಣದಲ್ಲಿ ವೈರಲ್ ಆಗಿದ್ದು,     ಸಾರ್ವಜನಿಕ ವಲಯದಲ್ಲಿ ಆಕ್ರೋಶ ವ್ಯಕ್ತವಾಗಿದೆ. ಜಾಲತಾಣದಲ್ಲಿ ಆಕ್ರೋಶ ವ್ಯಕ್ತವಾದ ಹಿನ್ನೆಲೆಯಲ್ಲಿ ಅಬಕಾರಿ ಅಧಿಕಾರಿಗಳು ಬಾರ್ ಮಾಲಕನ ವಿರುದ್ಧ ಎಫ್ಐಆರ್ ದಾಖಲಿಸಿದ್ದಾರೆ.

ಸಾಮಾನ್ಯವಾಗಿ ಕರ್ನಾಟಕದ ಕಾನೂನು ಪ್ರಕಾರ, 18 ವರ್ಷ ತುಂಬಿದವರಿಗೆ ಬಾರ್ ನಲ್ಲಿ ಕುಡಿಯುವುದು ನಿಷಿದ್ಧವಲ್ಲ. ಕೇರಳದಲ್ಲಿ ಮದ್ಯ ಮಾರಾಟ ಮತ್ತು ಸೇವನೆಗೆ 22 ವಯಸ್ಸಾಗಿರಬೇಕು ಎಂಬ ಕಾನೂನು ಇದ್ದರೂ, ಕರ್ನಾಟಕದಲ್ಲಿ ಇಂಥ ಕಟ್ಟುನಿಟ್ಟು ಮಾಡಿಲ್ಲ. ಆದರೆ ಲಿಕ್ಕರ್ ಲಾಂಜ್ ನಲ್ಲಿ ನೇರವಾಗಿ ವಿದ್ಯಾರ್ಥಿ- ವಿದ್ಯಾರ್ಥಿನಿಯರನ್ನೇ ಟಾರ್ಗೆಟ್ ಮಾಡಿ ಡಿಸ್ಕೌಂಟ್ ಆಫರ್ ನೀಡಲಾಗಿದೆ. ಆಮೂಲಕ ವಿದ್ಯಾರ್ಥಿಗಳೇ ಬಂದು ಕುಡಿಯಿರಿ, ತೂರಾಡಿ ಎಂದು ಬಾರ್ ಮಾಲೀಕನೇ ಯಾವುದೇ ಕಾನೂನು ಕಟ್ಟಳೆಗಳ ಭಯ ಇಲ್ಲದೆ ಆಫರ್ ನೀಡಿರುವಂತಿದೆ. ಮಂಗಳೂರಿನ ಕೆಲವು ಪಬ್ ಗಳಲ್ಲಿ ಮೆಡಿಕಲ್ ವಿದ್ಯಾರ್ಥಿಗಳಿಗೆ ಡಿಸ್ಕೌಂಟ್ ರೇಟ್ ಇದೆ. ಇದರ ನೆಪದಲ್ಲಿ ಲಿಕ್ಕರ್ ಲಾಂಜ್ ನಲ್ಲಿಯೂ ನೇರವಾಗಿ ವಿದ್ಯಾರ್ಥಿಗಳನ್ನು ಕುಡಿತಕ್ಕೆ ಆಹ್ವಾನಿಸಿದ್ದಾರೆ.

ಇದಲ್ಲದೆ, ಲಿಕ್ಕರ್ ಲಾಂಜ್ ಗೆ ಸಿಎಲ್- 7 ಮಾದರಿಯ ಲೈಸನ್ಸ್ ಇರುವುದೆಂದು ಅಬಕಾರಿ ಅಧಿಕಾರಿಗಳು ದಾಖಲಿಸಿರುವ ಎಫ್ಐಆರ್ ನಲ್ಲಿ ಉಲ್ಲೇಖವಾಗಿದೆ. ಸಿಎಲ್- 7 ಪ್ರಕಾರ, ಲಾಡ್ಜ್ ಇರುವ ಹೊಟೇಲ್ ಗಳಿಗೆ ಮಾತ್ರ ಈ ಲೈಸನ್ಸ್ ಕೊಡುವುದು. ಕಾರ್ಪೊರೇಶನ್ ವ್ಯಾಪ್ತಿಯಲ್ಲಿ ಕನಿಷ್ಠ 20 ಲಾಡ್ಜ್ ರೂಂಗಳಿದ್ದರೆ ಮಾತ್ರ ಈ ಮಾದರಿ ಲೈಸನ್ಸ್ ಸಿಗುತ್ತದೆ. ಅಲ್ಲಿ ಲಾಡ್ಜ್ ಗಳಿಗೆ ಬರುವ ಅತಿಥಿಗಳಿಗೆ ಮಾತ್ರ ಮದ್ಯ ಪೂರೈಸಲು ಅವಕಾಶ. ಇತರೇ ಸಾರ್ವಜನಿಕರಿಗೆ ಮದ್ಯ ಮಾರಾಟ ಮಾಡುವಂತಿಲ್ಲ. ಬಾರ್ ಗಳ ಮಾದರಿಯಲ್ಲಿ ಓಪನ್ನಾಗಿ ಸಾರ್ವಜನಿಕರಿಗೆ ಮದ್ಯ ಪೂರೈಸುವುದಕ್ಕೂ ಅವಕಾಶ ಇರುವುದಿಲ್ಲ.

ಸ್ಥಳೀಯರು ಹೇಳುವಂತೆ, ಲಿಕ್ಕರ್ ಲಾಂಜ್ ನಲ್ಲಿ ಸಾರ್ವಜನಿಕರಿಗೆ ಚಿಲ್ಲರೆ ಮದ್ಯ ಮಾರಾಟ ಮಾಡಲಾಗುತ್ತದೆ. ಬಾರ್ ಅಂಡ್ ರೆಸ್ಟೋರೆಂಟ್ ರೀತಿಯಲ್ಲಿ ಫುಡ್ ಮತ್ತು ಮದ್ಯ ಪೂರೈಕೆಯೂ ಆಗುತ್ತದೆ. ಸಿಎಲ್- 9 ಮಾದರಿಯ ಲೈಸನ್ಸ್ ಪಡೆದಲ್ಲಿ ಮಾತ್ರ ಬಾರ್ ಅಂಡ್ ರೆಸ್ಟೋರೆಂಟ್ ನಡೆಸಲು ಅವಕಾಶ ಇದೆ. ಮಂಗಳೂರಿನ ಹಲವೆಡೆ ಈ ರೀತಿ ಸಿಎಲ್-7 ಲೈಸನ್ಸ್ ಪಡೆದು ಬಾರ್ ಅಂಡ್ ರೆಸ್ಟೋರೆಂಟ್ ನಡೆಸುತ್ತಿದ್ದು ಇದೆಲ್ಲ ಅಬಕಾರಿ ಅಧಿಕಾರಿಗಳಿಗೆ ತಿಳಿಯದ ವಿಷಯವೇನಲ್ಲ. ಇದಲ್ಲದೆ, ಕೇವಲ ವೈನ್ ಶಾಪ್ ಲೈಸನ್ಸ್ ಪಡೆದಿದ್ದರೂ ಹಿಂಭಾಗದಲ್ಲಿ ಬಾರ್ ಅಂಡ್ ರೆಸ್ಟೋರೆಂಟ್ ರೀತಿ ಆಹಾರ ಮತ್ತು ಮದ್ಯ ಪೂರೈಸುವ ವ್ಯವಸ್ಥೆ ಮಾಡಿಕೊಂಡಿರುವುದೂ ಮಂಗಳೂರಿನ ಕೆಲವೆಡೆ ಇದೆ. ಅಬಕಾರಿ ಮತ್ತು ಪೊಲೀಸರು ಇದೆಲ್ಲ ‘ಮಾಮೂಲಿ’ ಅಂತ ಕಣ್ಮುಚ್ಚಿ ಕುಳಿತಿದ್ದಾರೆ.

• Join our WhatsApp group
• Follow us on Facebook 
• Follow us on Twitter

Mangalore Liquid Lounge discount offer for drinks to students goes viral, FIR booked. After the flyer went viral the excise department has filed FIR with fine. Big offer for alcohol for students was offered by the resturant later it went viral on social media.