ಬೆಂಗಳೂರು , ಅ.6: ಜೈಲು ಡಿಐಜಿ ಸೋಮಶೇಖರ್ ಬಂಧನ ಪ್ರಕರಣಕ್ಕೆ ಬಿಗ್ ಟ್ವಿಸ್ಟ್ ಸಿಕ್ಕಿದೆ. ಕೈದಿ ಪತ್ನಿಯನ್ನೇ ಲೈಂಗಿಕವಾಗಿ ಬಳಸಿಕೊಂಡಿದ್ದಲ್ಲದೆ, ಪ್ರತಿಯಾಗಿ ಜೀವಾವಧಿ ಶಿಕ್ಷೆಗೆ ಗುರಿಯಾಗಿದ್ದ ಕೈದಿಯನ್ನು ಬಿಡುಗಡೆ ಮಾಡಿಸಲು ಸುಪ್ರೀಂ ಕೋರ್ಟ್‌ ನಕಲಿ ಆದೇಶವನ್ನು ಸೃಷ್ಟಿಸಿರುವುದು ಬೆಳಕಿಗೆ ಬಂದಿದೆ. 

ಎಂಟು ವರ್ಷಗಳಿಂದ ಮುಚ್ಚಿಹೋಗಿದ್ದ ಜೈಲು ಅಕ್ರಮವೊಂದು 2026ರ ಆರಂಭದಲ್ಲಿ ಬಂದ ಅನಾಮಧೇಯ ಪತ್ರದ ಬಳಿಕ ಬಯಲಾಗಿತ್ತು. ಇದರಂತೆ, ಜೀವಾವಧಿ ಶಿಕ್ಷೆಗೆ ಗುರಿಯಾಗಿದ್ದ ಶಂಕರ್ ಆರ್ಮುಗಂ ಎಂಬ ಕೈದಿ ಮತ್ತು ನಕಲಿ ಆದೇಶ ಸೃಷ್ಟಿಸಿದ್ದ ಜೈಲು ಸಿಬಂದಿ ಶ್ರೀಕಾಂತ್ ಎಂಬವರನ್ನು ಸೆ.15ರಂದು ಬಂಧಿಸಲಾಗಿತ್ತು. ಆದರೆ ಕೈದಿ ಶಂಕರ್ ಪತ್ನಿಯ ಹೇಳಿಕೆ ಇಡೀ ಪ್ರಕರಣಕ್ಕೆ ಟ್ವಿಸ್ಟ್ ನೀಡಿದ್ದು ಜೈಲು ಡಿಐಜಿಯನ್ನೇ ಕಂಬಿ ಎಣಿಸುವಂತೆ ಮಾಡಿದೆ. 

ತಮಿಳುನಾಡು ಮೂಲದ ಶಂಕರ್ ಆರ್ಮುಗಂ ಮತ್ತು ಆತನ ಗ್ಯಾಂಗ್ 2001ರಲ್ಲಿ ಹಣಕ್ಕಾಗಿ ವ್ಯಕ್ತಿಯೊಬ್ಬನನ್ನು ಅಪಹರಿಸಿತ್ತು. ಪ್ರಕರಣದ ವಿಚಾರಣೆ ನಡೆಸಿದ ನ್ಯಾಯಾಲಯವು 2004ರಲ್ಲಿ ಶಂಕರ್‌ಗೆ ಜೀವಾವಧಿ ಶಿಕ್ಷೆ ಹಾಗೂ ₹10,000 ದಂಡ ವಿಧಿಸಿತ್ತು. ಹೈಕೋರ್ಟ್ ಹಾಗೂ ಸುಪ್ರೀಂ ಕೋರ್ಟ್ ಎರಡರಲ್ಲೂ ಮೇಲ್ಮನವಿ ಸಲ್ಲಿಸಿದ್ದರೂ, ಎರಡೂ ಕಡೆ ಶಿಕ್ಷೆ ಎತ್ತಿಹಿಡಿಯಲ್ಪಟ್ಟಿತ್ತು. ಸುಪ್ರೀಂ ಕೋರ್ಟ್‌ನಲ್ಲಿ ಅಪೀಲು ವಜಾಗೊಂಡಿದ್ದರೂ, ಜೈಲು ಸಿಬ್ಬಂದಿ ಶ್ರೀಕಾಂತ್ ಹಾಗೂ ಜೈಲು ಡಿಐಜಿ ಸೋಮಶೇಖರ್ ಸಹಾಯದಿಂದ ಸುಪ್ರೀಂ ಕೋರ್ಟ್ ಹೆಸರಲ್ಲೇ ನಕಲಿ ಆದೇಶ ಪ್ರತಿಯನ್ನು ಸೃಷ್ಟಿಸಲಾಗಿತ್ತು. ಅದರಲ್ಲಿ ಕೈದಿಗೆ ಕೇವಲ ₹10,000 ದಂಡ ವಿಧಿಸಿ ಬಿಡುಗಡೆ ಮಾಡಲು ಆದೇಶಿಸಲಾಗಿದೆ ಎಂದು ನಕಲಿ ಸಹಿ, ಸೀಲು ಹಾಕಿ ಫೋರ್ಜರಿ ಮಾಡಲಾಗಿತ್ತು. ಇದನ್ನೇ ನೈಜ ಎಂದು ನಂಬಿದ್ದ ಜೈಲು ಅಧಿಕಾರಿಗಳು, ನವೆಂಬರ್ 13, 2018 ರಂದು ₹10,000 ದಂಡ ಕಟ್ಟಿಸಿಕೊಂಡು ಶಂಕರ್‌ನನ್ನು ಜೈಲಿನಿಂದ ಮುಕ್ತಗೊಳಿಸಿದ್ದರು.

ಇತ್ತೀಚೆಗೆ (ಮೇ 2026) ಕಾರಾಗೃಹ ಇಲಾಖೆಯ ಮಹಾನಿರ್ದೇಶಕರಿಗೆ ಅನಾಮಧೇಯ ದೂರು ಪತ್ರವೊಂದು ಬಂದಿತ್ತು. ಅದರಲ್ಲಿ ಅಧಿಕಾರಿಗಳೇ ಸೇರಿ ಅಕ್ರಮ ನಡೆಸಿರುವ ಬಗ್ಗೆ ಮಾಹಿತಿ ಇತ್ತು. ಜೈಲು ಅಧಿಕಾರಿಗಳು ತಕ್ಷಣ ಸುಪ್ರೀಂ ಕೋರ್ಟ್‌ನ ಅಸಿಸ್ಟೆಂಟ್ ರಿಜಿಸ್ಟ್ರಾರ್ ಅವರನ್ನು ಸಂಪರ್ಕಿಸಿ ದಾಖಲೆಗಳನ್ನು ಪರಿಶೀಲಿಸಿದಾಗ, ಕೋರ್ಟ್ ಅಂತಹ ಯಾವುದೇ ಆದೇಶ ನೀಡಿಲ್ಲ ಎಂಬುದು ಕಂಡುಬಂತು. ಈ ಸಂಬಂಧ ಪರಪ್ಪನ ಅಗ್ರಹಾರ ಪೊಲೀಸ್ ಠಾಣೆಯಲ್ಲಿ ವಂಚನೆ, ದಾಖಲೆಗಳ ತಿದ್ದುಪಡಿ ಹಾಗೂ ಕ್ರಿಮಿನಲ್ ಪಿತೂರಿ ಬಗ್ಗೆ ಪ್ರಕರಣ ದಾಖಲಿಸಿದ್ದು ಮೈಸೂರಿನಲ್ಲಿ ವಾಸವಿದ್ದ ಕೈದಿ ಶಂಕರ್ ಆರ್ಮುಗಂ ಹಾಗೂ ಜೈಲು ಸಿಬ್ಬಂದಿ ಶ್ರೀಕಾಂತ್ ನನ್ನು ಬಂಧಿಸಲಾಗಿತ್ತು. ಇದರ ಮುಂದುವರೆದ ಭಾಗವಾಗಿ ಪರಪ್ಪನ ಅಗ್ರಹಾರ ಪೊಲೀಸರು ಇದೀಗ ಜೈಲು DIG ಸೋಮಶೇಖರ್ ಅವರನ್ನು ಬಂಧಿಸಿದ್ದಾರೆ.

ತನಿಖೆಯ ವೇಳೆ ಕೈದಿ ಶಂಕರ್‌ ಪತ್ನಿಯ ಹೇಳಿಕೆಯನ್ನು ಪೊಲೀಸರು ಪಡೆದಿದ್ದು ಈ ವೇಳೆ ಆಘಾತಕಾರಿ ವಿಷಯ ಬೆಳಕಿಗೆ ಬಂದಿತ್ತು, ಜೈಲಿನಲ್ಲಿದ್ದ ಎಸ್‌ಡಿಎ ಶ್ರೀಕಾಂತ್ ಮತ್ತು ಅಂದಿನ ಜೈಲು ಮುಖ್ಯಸ್ಥರಾಗಿದ್ದ ಸೋಮಶೇಖರ್ ಇಬ್ಬರೂ ಸೇರಿ, ಪತಿಯನ್ನು ಜೈಲಿನಿಂದ ಬಿಡುಗಡೆ ಮಾಡಿಸುವುದಾಗಿ ನಂಬಿಸಿ ಮಹಿಳೆಯನ್ನು ಲೈಂಗಿಕವಾಗಿ ಶೋಷಣೆಗೆ ಒಳಪಡಿಸಿದ್ದರು ಎಂಬುದು ತನಿಖೆಯಲ್ಲಿ ಪತ್ತೆಯಾಗಿತ್ತು. ಇದಲ್ಲದೆ, ಜೈಲಿನಲ್ಲಿ ಹಲವು ನಿಯಮಬಾಹಿರ ಕೃತ್ಯಗಳನ್ನು ಎಸಗಿದ್ದರು ಎನ್ನಲಾಗಿದೆ. ಕೈದಿ ಶಂಕರ್‌ಗೆ 2018ರಲ್ಲಿ ಪ್ರತ್ಯೇಕ ಅವಧಿಗಳಲ್ಲಿ ಮೂರು ಬಾರಿ, ತಲಾ 15 ದಿನಗಳಂತೆ ನಿಯಮಗಳನ್ನು ಗಾಳಿಗೆ ತೂರಿ ಜಾಮೀನು ನೀಡಲಾಗಿತ್ತು. ಪೆರೋಲ್‌ ನೀಡುವಾಗ ಪಾಲಿಸಬೇಕಾದ ನಿಯಮ ಪಾಲಿಸಿರಲಿಲ್ಲ. 

2018ರಲ್ಲಿ ನಡೆದಿದ್ದ ಕೈದಿಯ ಅಕ್ರಮ ಬಿಡುಗಡೆ ಪ್ರಕರಣ ಎಂಟು ವರ್ಷಗಳ ಬಳಿಕ ಬಂಧೀಖಾನೆ ಇಲಾಖೆಯಲ್ಲಿ ತೀವ್ರ ಸಂಚಲನ ಎಬ್ಬಿಸಿದೆ. ನಕಲಿ ಸುಪ್ರೀಂ ಕೋರ್ಟ್ ಆದೇಶ ಸಿದ್ಧಪಡಿಸಿದ ಆರೋಪ, ಅದನ್ನು ಬಳಸಿ ಕೈದಿಯನ್ನು ಬಿಡುಗಡೆ ಮಾಡಿದ ಪ್ರಕ್ರಿಯೆ ಹಾಗೂ ಅಧಿಕಾರಿಗಳ ಪಾತ್ರದ ಬಗ್ಗೆ ಪೊಲೀಸರು ಸಾಕ್ಷ್ಯ ಸಂಗ್ರಹಿಸುತ್ತಿದ್ದಾರೆ. ಕಲಬುರಗಿ ಕಾರಾಗೃಹ ಇಲಾಖೆಯ ಡಿಐಜಿ ಆಗಿದ್ದ ಸೋಮಶೇಖರ್ ಅವರನ್ನು ಪರಪ್ಪನ ಅಗ್ರಹಾರ ಪೊಲೀಸರು ಅಕ್ಟೋಬರ್ 9ರ ವರೆಗೆ ಪೊಲೀಸ್ ಕಸ್ಟಡಿಗೆ ಪಡೆದಿದ್ದಾರೆ.

Karnataka Prisons Department DIG M. Somashekar has been arrested by Parappana Agrahara police in connection with the alleged release of a life-term convict using a forged Supreme Court order in 2018. Police have also alleged that the convict’s wife was sexually exploited in connection with efforts to secure her husband’s release. Somashekar was remanded to police custody until October 9.