ಮಾಸ್ಕೋ , ಅ 06: ರಷ್ಯಾದ ಸೈಬೀರಿಯಾದ ಇರ್ಕುಟ್ಸ್ಕ್ ಪ್ರದೇಶದಲ್ಲಿ 28 ವರ್ಷದ ಪ್ರಯೋಗಾಲಯ ಸಿಬ್ಬಂದಿ ಮೃತಪಟ್ಟ ಬಳಿಕ ನ್ಯುಮೋನಿಕ್ ಪ್ಲೇಗ್ ಎನ್ನುವ ಹೊಸ ಸೋಂಕು ಹರಡುವಿಕೆ ಬಗ್ಗೆ ಜಗತ್ತಿನಾದ್ಯಂತ ಆತಂಕ ವ್ಯಕ್ತವಾಗಿದೆ. ಮೃತಪಟ್ಟ ಮಹಿಳೆ ಪ್ಲೇಗ್ ಸಂಶೋಧನಾ ಸಂಸ್ಥೆಯಲ್ಲಿ ಕೆಲಸ ಮಾಡುತ್ತಿದ್ದ ಹಿನ್ನೆಲೆಯಲ್ಲಿ ಈ ಅನುಮಾನ ಮೂಡಿದೆ. ಆದರೆ ರಷ್ಯಾದ ಆರೋಗ್ಯ ಅಧಿಕಾರಿಗಳು ಇದುವರೆಗೆ ಪ್ಲೇಗ್ ಸೋಂಕನ್ನು ದೃಢಪಡಿಸಿಲ್ಲ. ಅಧಿಕೃತವಾಗಿ ‘ನಿರ್ದಿಷ್ಟ ಕಾರಣ ಪತ್ತೆಯಾಗದ ನ್ಯುಮೋನಿಯಾ’ ಎಂದು ತಿಳಿಸಲಾಗಿದೆ.

ಮೃತರನ್ನು ದರ್ಯಾ ಶಿಪಿಲೋವಾ ಎಂದು ಗುರುತಿಸಲಾಗಿದೆ. ಇರ್ಕುಟ್ಸ್ಕ್ ಆ್ಯಂಟಿ ಪ್ಲೇಗ್ ರಿಸರ್ಚ್ ಇನ್‌ಸ್ಟಿಟ್ಯೂಟ್‌ನಲ್ಲಿ ಪ್ರಯೋಗಾಲಯ ಸಿಬ್ಬಂದಿಯಾಗಿದ್ದ ಶಿಪಿಲೋವಾ ತೀವ್ರ ಶ್ವಾಸಕೋಶದ ಸಮಸ್ಯೆಯಿಂದ ಆಸ್ಪತ್ರೆಗೆ ದಾಖಲಾಗಿದ್ದರು. ಬಳಿಕ ಚಿಕಿತ್ಸೆ ಫಲಕಾರಿಯಾಗದೆ ಅಕ್ಟೋಬರ್ 2ರಂದು ಮೃತಪಟ್ಟಿದ್ದರು. 

200ಕ್ಕೂ ಹೆಚ್ಚು ಮಂದಿ ವೈದ್ಯಕೀಯ ನಿಗಾದಲ್ಲಿ

ಶಿಪಿಲೋವಾ ಅವರೊಂದಿಗೆ ಸಂಪರ್ಕ ಹೊಂದಿದ್ದ ಸುಮಾರು 200 ಮಂದಿಯನ್ನು ಮುನ್ನೆಚ್ಚರಿಕಾ ಕ್ರಮವಾಗಿ ವೈದ್ಯಕೀಯ ನಿಗಾದಲ್ಲಿರಿಸಲಾಗಿದೆ. ಕೆಲವರನ್ನು ಆಸ್ಪತ್ರೆಗಳಲ್ಲಿ ಪ್ರತ್ಯೇಕವಾಗಿ ಇರಿಸಿ ಮೇಲ್ವಿಚಾರಣೆ ಮಾಡಲಾಗುತ್ತಿದೆ. ಇದುವರೆಗೆ ಸಂಪರ್ಕಿತರಲ್ಲಿ ಪ್ಲೇಗ್ ಸೋಂಕು ಪತ್ತೆಯಾಗಿದೆ ಎಂಬ ಅಧಿಕೃತ ಮಾಹಿತಿ ಹೊರಬಂದಿಲ್ಲ. ಬದಲಿಗೆ ಕೆಲವರಲ್ಲಿ ಕೋವಿಡ್-19 ಮತ್ತು ರೈನೋವೈರಸ್ ಸೋಂಕುಗಳು ಪತ್ತೆಯಾಗಿವೆ ಎಂದು ರಷ್ಯಾದ ಆರೋಗ್ಯ ಅಧಿಕಾರಿಗಳು ತಿಳಿಸಿದ್ದಾರೆ.

ಶಿಪಿಲೋವಾ ಪ್ರಯೋಗಾಲಯದಲ್ಲಿ ಪ್ಲೇಗ್ ಬ್ಯಾಕ್ಟೀರಿಯಾ ಹೊಂದಿದ್ದ ಪರೀಕ್ಷಾ ಟ್ಯೂಬ್ ಒಡೆದ ಪರಿಣಾಮ ಸೋಂಕಿಗೆ ಒಳಗಾಗಿರಬಹುದು ಎಂಬ ವರದಿಗಳು ರಷ್ಯಾದ ಸ್ಥಳೀಯ ಮಾಧ್ಯಮಗಳು ಮತ್ತು ಸಾಮಾಜಿಕ ಮಾಧ್ಯಮಗಳಲ್ಲಿ ಹರಿದಾಡುತ್ತಿವೆ. ಆದರೆ ಈ ಮಾಹಿತಿಗೆ ಇದುವರೆಗೆ ಅಧಿಕೃತ ದೃಢೀಕರಣವಿಲ್ಲ. ರಷ್ಯಾದ ರೋಸ್ಪೊಟ್ರೆಬ್ನಾಡ್ಜೋರ್ ನಡೆಸಿದ ಪರಿಶೀಲನೆಯಲ್ಲಿ ಸಂಸ್ಥೆಯಲ್ಲಿನ ಅಪಾಯಕಾರಿ ಸೂಕ್ಷ್ಮಜೀವಿಗಳೊಂದಿಗೆ ಸಂಬಂಧಿಸಿದ ಯಾವುದೇ ಪ್ರಕರಣ ಪತ್ತೆಯಾಗಿಲ್ಲ ಎಂದು ತಿಳಿಸಲಾಗಿದೆ. ಮೃತ ಮಹಿಳೆಯ ಮಾದರಿಗಳಲ್ಲೂ ಆಕೆಯ ವೃತ್ತಿಪರ ಚಟುವಟಿಕೆಗಳಿಗೆ ಸಂಬಂಧಿಸಿದ ರೋಗಕಾರಕ ಸೂಕ್ಷ್ಮಜೀವಿಗಳು ಪತ್ತೆಯಾಗಿಲ್ಲ ಎಂದು ಅಧಿಕಾರಿಗಳು ಹೇಳಿದ್ದಾರೆ.

ಇರ್ಕುಟ್ಸ್ಕ್ ಪ್ರದೇಶದ ಅಧಿಕಾರಿಗಳು ಸಾರ್ವಜನಿಕರು ಆತಂಕಕ್ಕೊಳಗಾಗಬಾರದು ಎಂದು ಮನವಿ ಮಾಡಿದ್ದಾರೆ. ಆರೋಗ್ಯ ವ್ಯವಸ್ಥೆ ಪರಿಸ್ಥಿತಿಯನ್ನು ನಿಗಾದಲ್ಲಿಟ್ಟುಕೊಂಡಿದ್ದು, ಸಂಪರ್ಕಿತರ ಮೇಲೆ ವೈದ್ಯಕೀಯ ಮೇಲ್ವಿಚಾರಣೆ ಮುಂದುವರಿದಿದೆ. ರಷ್ಯಾದ ಆರೋಗ್ಯ ಮೇಲ್ವಿಚಾರಣಾ ಸಂಸ್ಥೆಯ ಪ್ರಕಾರ, ಸದ್ಯದ ತನಿಖೆಯಲ್ಲಿ ಪ್ಲೇಗ್ ಸೋಂಕು ದೃಢಪಟ್ಟಿಲ್ಲ. ಆದ್ದರಿಂದ ಈ ಘಟನೆಯನ್ನು ಪ್ರಸ್ತುತ ಪ್ಲೇಗ್‌ ಏಕಾಏಕಿ ಹರಡುವಿಕೆ ಎಂದು ಪರಿಗಣಿಸಲು ಸಾಕಷ್ಟು ಸಾಕ್ಷ್ಯವಿಲ್ಲ.

ನ್ಯುಮೋನಿಕ್ ಪ್ಲೇಗ್ ಎಂದರೇನು?

ನ್ಯುಮೋನಿಕ್ ಪ್ಲೇಗ್‌ ಎಂದರೆ Yersinia pestis ಬ್ಯಾಕ್ಟೀರಿಯಾದಿಂದ ಉಂಟಾಗುವ ಪ್ಲೇಗ್‌ನ ಶ್ವಾಸಕೋಶ ಸಂಬಂಧಿತ ರೂಪ. ಇದು ಪ್ಲೇಗ್‌ನ ಅತ್ಯಂತ ಗಂಭೀರ ರೂಪಗಳಲ್ಲಿ ಒಂದಾಗಿದ್ದು, ಸೋಂಕಿತ ವ್ಯಕ್ತಿಯ ಉಸಿರಾಟದ ಹನಿಗಳ ಮೂಲಕ ಮನುಷ್ಯರಿಂದ ಮನುಷ್ಯರಿಗೆ ಹರಡಬಹುದು. ವಿಶ್ವ ಆರೋಗ್ಯ ಸಂಸ್ಥೆಯ ಪ್ರಕಾರ, ಇದರ ಲಕ್ಷಣಗಳು ಸೋಂಕಿನ ಬಳಿಕ ಕೆಲವೊಮ್ಮೆ 24 ಗಂಟೆಗಳಲ್ಲೇ ಕಾಣಿಸಿಕೊಳ್ಳಬಹುದು. ಜ್ವರ, ಕೆಮ್ಮು, ಉಸಿರಾಟದ ತೊಂದರೆ ಹಾಗೂ ಕೆಲ ಸಂದರ್ಭಗಳಲ್ಲಿ ರಕ್ತ ಮಿಶ್ರಿತ ಕಫ ಕಾಣಿಸಿಕೊಳ್ಳಬಹುದು. ಚಿಕಿತ್ಸೆ ನೀಡದೆ ಬಿಟ್ಟರೆ ನ್ಯುಮೋನಿಕ್ ಪ್ಲೇಗ್ ವೇಗವಾಗಿ ಮಾರಕವಾಗಬಹುದು. ಆದರೆ ಆರಂಭಿಕ ಹಂತದಲ್ಲೇ ಗುರುತಿಸಿ ಸೂಕ್ತ ಆ್ಯಂಟಿಬಯಾಟಿಕ್ ಚಿಕಿತ್ಸೆ ನೀಡಿದರೆ ಚೇತರಿಕೆಯ ಸಾಧ್ಯತೆ ಹೆಚ್ಚಿದೆ ಎಂದು ವೈದ್ಯರು ಹೇಳುತ್ತಾರೆ.

Concerns over a possible case of pneumonic plague have emerged in Russia’s Siberian region of Irkutsk after a 28-year-old laboratory worker at an anti-plague research institute died following severe pneumonia. However, Russian health authorities have not confirmed plague infection and have officially described the illness as pneumonia of unknown origin.